IKASKIDEEKIKO LARDERIA ETA TRATU TXARRA
FAMILIENDAKO AHOLKUAK
Bullying-ak edo ikaskideekiko tratu txarrak eragin berezia du nerabezaroan. Gure seme-alabak kideen arteko harremanak finkatzen hasten dira orduan, eta garai honetan hasten dira gizarte harremanak modu independente batean ikasten eta horiek praktikan jartzen.
Komeni da argitzea gure seme-alabek bizi dituzten gatazka guztiak ezin direla bullying-tzat jo. Gaizki ulertuak, haserrealdiak, lagunak taldez aldatzea… horiek nerabezaroko gizarte harremanen mundua eraikitzen laguntzen duten arazoak dira. Indarkeria prebenitzeko modurik onena da, arazo horiek modu positibo batean konpontzen ikastea, bestearen posturak ulertzen saiatuz.
Aholku hauek seme-alaben heziketan aplikatzeak balio ahalko dizu zure seme-alabek ikas dezaten beraien bulkadak kontrolatzen. Baina ez ezazu etsi, hau prozesu luzea da. Prozesu honetan arrunt garrantzitsua da familian txiki-txikitatik eskaintzen zaion eredua.
Eredu positiboak ematea. Familia harreman onak mantentzea. Erakutsi helduek etxean duten jokaera ez dela erasotzailea, ezta oldarkorra ere. Gatazkak konpon itzazue modu adiskidetsuan. Ez ezazue indarkeriarik onartu. Gurasoen helburuak izan behar du seme-alaba bati egindako komentario negatibo bakoitzeko, bost positibo egitea.
Hitz egin ezazu seme-alabekin egunero: entzun itzazu beraien iritziak gutxietsi gabe, ez iezaiozu esan ergelkeria dela esaten ari dena, nahiz eta hori iruditu. Lagun iezaiozu bere arazoak konpontzen, bera besteen lekuan jartzen lagundu. Ez iezaiozu utzi bere ikaskideei zirikatzen. Lagun iezaiozu bere ekintzen gainean hausnartzen.
Hezi ezazu errespetu eta tolerantzia balioetan lagun iezaiozu hazten gainontzekoen sentimenduekin bat egiten, besteak sentitzen duena ulertzen saiatuz, diferentziak errespetatuz eta aniztasunak eskaintzen digun aberastasuna ulertaraziz. Ez ezazu sobera babestu, lagun iezaiozu independentea izaten, nahiz eta inoiz hautu okerrak egin. Horrek ere “hazten” lagunduko dio. Unea iritsitakoan, hobeki prestatua egonen da gatazka-egoerei aurre egiteko.
Defini itzazu arau argiak eta sendoak. Azal ezazu modu argian zer dagoen baimenduta eta zer ez, behar diren argudioak emanez eta arau gutxi aplikatuz, baina irmoki. Ez du deusetarako balio arau asko proposatzeak gero horiek ez badira betearazten.
Eman iezazkiozu aukerak lagunak egin ditzan: galde egiozu nola tratatzen duten ikaskideek, interesa erakuts ezazu horiek ezagutzeko, gonbida itzazu etxera eta har ezazu esku beraien arteko gatazketan, artekari lana egiten saiatuz, seme-alabak babestearen aldeko jarrerarik hartu gabe.
Kontrola itzazu telebistako programak: Programa eta bideojoko askok balio izaten dute ideia bat indartzeko: gatazkak gainditzeko modu bakarra indarkeria dela. Kontua ez da debekatzea, kritikoak izaten irakastea baizik.
Zaletasunen bat izatera bultzatu; larderia ematen da nerabeak taldean egon eta egiteko ezer onik ez dutenean.
Hitz egin ezazu arazoei aurre egiteko moduaren gainean: Molestatzen edo beldurtzen badute, lagun egiozu erantzun egokiak izaten. Ez egiozu mendekua aholkatu. Modu oldarkorrean erantzutea defentsarik txarrena da, eta arrazoi gehiago ematen dizkio erasotzaileari erasoari berriz ere ekiteko. Azal egiozu zer desberdintasun dagoen erantzun adierazkorraren (norberarekiko segurtasuna, irmoa) eta erantzun oldarkorraren (bortitza, beligerantea, etsaitasunezkoa) artean. Erasoen ikusle den seme-alaba estimula ezazu horien aurrean egoki joka dezan.
Inplika zaitez seme-alabaren eskola-bilakaeran: Izan itzazu harremanak ikastetxearekin, lagun iezaiezu irakasleei. Zalantzaren bat edo kexaren bat baduzu, hitz egin ezazu irakasleekin, baina ez egiezu indarra kendu seme-alabaren aurrean. Har ezazu parte, beste guraso batzuekin batera, eskola-elkarbizitzaren gaineko eztabaida taldeetan.
Tags: aholkuak bullying-ak, aholkuak, ikaskideekiko, larderia, tratu, bullyingak, txarra, familiendako